Wat Wather an earlie Prootas.

Onywye thaur is ony amount o things gane on roon aboot is this wather, tha Queens Jubilee visit is jest by an wae hae had tha Irish Open on wur ain doarstep forbye. What aboot tha fitbaa some o it guid some o it bad an aff coorse in mae ain opeenyin baith Englan an Irelan wud hae bane betther tae hae styed at hame. Aff coorse wae hae had a brav drap o renn mair nir enouch A hear ye cry, weel thats richt bit sure wae ir a still abane tha grun sae thaur is nae use o gernin.

Hooiniver A mann sae yin thing aboot this time tha year, sae here it is, what dae ye think o tha earlies tha year ? Noo fur tha hard o hearin am taakin aboot earlie prootas an A hae a graet lakin fur Sherps Express.

A mine as a wean A aye luked forrit tae gettin twarthie guid new prootas wae a big scallion alang wae a lump o guid country butther an a dab o salt, och aye an aff coorse a gless o guid butther milk.

Noo thats whaut A caa guid mate. Aff coorse that is a but only a memory noo an some o tha yung yins widnae know whaut am taakin aboot. Noo enouch o this fool taak, tha month July is whun wae shud aye mine tha Battle o Tha Somme whaur sae mony o whaur ain fore feythers focht in France an sae mony wur kilt tae gie is tha freedom wae hae tha dey.

A hale generashun o yung men frae roon wur ain toonlans in Ulster, a creeds an classes wur there in tha Graet War, aye an naw jest frae tha fiels o Ulster but frae tha hale o Erins Isle, wae will aye mine them for in minin them A think it shud alwyes pit tha noshun oot o wur heids tha gane tae war is a guid idea tae hae. Sae on that sayerious line o thocht A hae pit mae nib awa fur anither dey.

Sae til tha nixt time luk efter yersel an luk efter yer niebor.Keep it Ullans.

Tha Poocher July 2012